तिलक पोखरेल म्यान्मारमा जन्मेर हाल बैङ्ककलाई आफ्नो कर्मथलो बनाई कविता साधनामा लागिरहेका नेपालीभाषी सर्जक हुन् । सन् २०२१ मा ‘शब्दरङ्गी’ कवितासङ्ग्रहसहित साहित्यजगतमा देखा परेका उनी छोटा आकारका गहन र दार्शनिक कविता लेख्ने कविको रूपमा परिचित छन् । ‘आनन्द उपहार’ उनका यस्तै सूक्ष्म र गहन १०८ कविताको सँगालो हो, जसमा उनले मानवीय सम्बन्धका विविध तह र आयामलाई तीक्ष्ण र सघन अभिव्यक्तिको माध्यमबाट सतहमा ल्याएका छन् । शब्दसङ्ख्याको दृष्टिले अत्यन्त मितव्ययी कवि तिलक कवितामा जेनचेत सहित उभिएको पाइन्छ ।