पोखराको प्राकृत र उर्वर भूगोलले हुर्काएका कवि अल्पज्ञानी गद्य र पद्य दुवै प्रभेदका कवितालाई उत्तिकै स्वाभाविकताका साथ लेख्छन् । लामो समयदेखि काव्यसाधनामा लागिरहेका सर्जक अल्पज्ञानी साहित्यिक अभियन्ता पनि हुन् । पुछारसिटे अभियानका एक अभियन्ता अल्पज्ञानीको नेतृत्वमा पोखरामा पछिल्ला केही वर्षमा थुप्रै सार्थक कार्यक्रम सम्पन्न भइसकेका छन् ।
‘उज्यालो पर्खिरहेको मानिस’ उनको पहिलो गद्य कवितासङ्ग्रह हो । सङ्ग्रहमा पोखरा आसपासका स्थानीय रङ, आम मान्छेका सुखदुःख, माया प्रेमका शाश्वत प्रसङ्गहरू र खस्कँदो मानवीय मूल्यप्रतिको कविको असन्तुष्टिजस्ता विषय समेटिएका छन् ।